Í skólanum á sunnudegi

Í mörg ár fór ég í sunnudagaskólann í Hafnarfjarðarkirkju og fékk þar myndir til að lita og möppu utan um þær. Á möppuna safnaði ég svo stjörnum sem ég fékk hvern sunnudag. Í dag er ég í skólanum á sunnudegi en fæ enga stjörnu! Hér er dimmt á göngunum og allar dyr læstar. Ég athuga því alltaf þrisvar áður en ég yfirgef herbergi hvort lyklarnir séu örugglega í vasanum. Væri svekkjandi að læsa lyklana inni með úlpunni, strætókortinu og símanum.

Í seinni tíð hef ég haft mikla óbeit á köttum og öðrum loðnum dýrum sem ég hef ofnæmi fyrir - þau eru allnokkur. Í morgun sá ég út um gluggann stelpu með köttinn sinn í bandi! Ekki nóg með það heldur var ólukkans kötturinn á öxlinni á henni eins og hver annar páfagaukur. Ég væri ekki einu sinni til í að halda í bandið og hvað þá að hafa köttinn við andlitið á mér - mig bara klæjar í nefið af tilhugsuninni!

Ekki meira núna.