Amagergellur

Á morgun verður gleðilegur dagur en erfiður. Búin að vera að pakka niður í kassa, töskur, svarta ruslapoka, ikea poka og ég veit ekki hvað og hvað undanfarna daga. Ástæðan er sú að ég og Gyða erum búnar að fá rosa fína íbúð á Amager og ætlum að hefja búskap þar á morgun. Búið er að kalla til liðsmenn sem munu hjálpa við flutninginn enda ekkert grín fyrir höndum. Fyrst þarf að taka allt mitt drasl, af þriðju hæð, og setja í bíl, keyra svo til Gyðu og ná í hennar drasl, af þriðju hæð og um hræðilega mjóan stiga. Svo þegar búið er að pakkfylla bílinn verður keyrt niður á Amager og dótið okkar borið upp á fjórðu hæð - hehe fjör!

Annars var ég að komast að því við þessa niðurpökkun að ég er með ótrúlega margar töskur hérna í Danmörku. Ég er nefnilega enn þá að flytja út og alltaf þegar einhver á leið til Köben er sá hinn sami beðinn að taka svo sem eins og eina tösku af drasli fyrir mig í leiðinni. Það hlýtur því bráðum að verða töskuskortur á Arnarhrauninu - trúi bara ekki öðru! Pæling að ég fari næst heim með troðfulla tösku af töskum - hmm... - bull.